| 1991. urtean, Easo Politeknikoa LHIIko Zurgintza eta Altzarigintzako Departamentuak antolatuta, Donostia Hiria Altzari-Lehiaketaren lehenengo edizioa burutu zen. Lehiaketa estatu osoko eta Akitaniako Altzarigintza, Zurgintza eta Kortxogintzaren familia profesionaleko ikasleei zuzendua zegoen. Hasieran urteroko lehiaketa fase batean garatu zen eta ondoren biurtekoan. Horrela, ilusioz beteriko 25 urteko bizitzan, XVIII. ediziora iritsi da 2016an. Joan den ostiralean, urtarrilak 13, edizio honetako sariak eman ziren Aldundiko tronu-aretoan. Sarituak izan zirenak Ourense, Vigo, Teruel, Badajoz, Kordoba eta Easo Politeknikoko Zurgintza eta Altzarigintza espezialitatetako ikasleak dira. Azken honetakoa da Bernat Ticó, sarituetako bat. Lehiaketaren XVIII. edizioaren sari berezia eman zitzaion Javier Jiménez Chave jaunari, orain dela gutxi arte ikastetxeko irakasle izan dena eta sariketaren alma materra. Sariak lehiaketaren babesle izan direnen ordezkariek eman zituzten: LHko Sailburuordetza, Gipuzkoako Foru Aldundia, Kutxa, Easo Politeknikoa, Profemadera eta Habic. Guztiek goraipatu zituzten sariak jaso dituzten gazteen proiektuen ahalmen artistikoa eta berrikuntzakoa. Sari banaketa amaitutakoan, 20 lanik onenekin osatutako erakusketa bisitatu zen. Hau otsailaren 13a arte egongo da Kutxak Tabakaleraren 4. solairuan duen erakusketa-gelan. Halaber, udaletxeko batzar-aretoan ongietorri-ekitaldia izan zen, non sarituak eta irakasleak hartu zituen Miren Azkarate andereak, Hezkuntza, Kultura eta Euskara zinegotzia. Zorionak Zurgintza eta Altzarigintza Departamentuaren ardurapean egon den lehiaketaren antolakuntzari.
—|—
