Easo Politeknikoko Anatomia Patologiko eta Zitodiagnotiko zikloko ikasleek Inspira Bizitzak 2023 topaketetan parte hartzeko aukera izan dute, bai eta bertan aurkeztu diren zientzia-aurkikuntzak ezagutzekoa ere. Inspira bizitzak Kutxa Fundazioak antolatzen dituen zientzia-topaketak dira, STEAM esparruan lan egiten duten profesionalen eta ikasleen arteko elkargune izatea helburu dutenak. Bertan, profil ezberdinetako langileek euren lan-ibilbideak ezagutarazi dituzte, gazteak zientziaren mundu zabal bezain liluragarrira gerturatu, euren zaletasunak identifikatu eta etorkizunera begira lan-esparruko ibilbide anitzak ezagutu ditzaten. Aurtengo edizioan, besteak beste, askapen kontrolatuko botika berriez aritu da Jackeline Soto-Cruz kimikaria, eta Oier Etxebeste mikrobiologian adituak gure inguruan topa ditzakegun onddo mikroskopikoen mundu zoragarria erakutsi du.
Plazera izan da profesional hain talendudunei entzutea, ikerlan interesgarri andana ezagutzea eta, batez ere, zientziaren plazara hurbiltzea.
