| Mugarik Gabeko Ekonomialariak erakundeak antolatutako ekonomia justu eta solidario bat eraikitzen gehien lagundu duen enpresa-egitasmoa lehiaketako saria Ikasenpresako “Irrifarren alde” proiektuak jaso du. EASO Politeknikoko Aho eta Hortz Higieneko ikasleak izan dira proiektua garatu dutenak, eta landutako negozio ideia egoera ekonomiko larrian dauden herritarrei aho garbiketak eskaintzea izan da, aho osasun egokia izan dezaten. Proiektua aurrera eramateko, Caritasekin elkarlanean aritu dira. Proposatu zaien erronka ondorengoa izan da: “Ekintzaile zareten heinean, Mugarik Gabeko Ekonomialariak erakundeak laguntza eskatzen dizue zuen enpresa-jardueraren bitartez ekonomia justuago eta solidarioago bat sortzeko. Horretarako, zuen enpresa-proiektuak Ekonomia Sozial eta Solidarioaren printzipioei jarraitu behar die, giza eskubideak eta ingurumena errespetatu eta Garapen Iraunkorreko Helburuak lortzen lagundu. Beste ekonomia bat izan dezakegu! Ausart zaitez enpresa arduratsu bat sustatzen!
—|—
