| Berriro hasi da ikasturte berria Easo Politeknikoan. Erakundearentzat 135. urtea izango da, 59.a eraikuntza honetan. Gure artean 1.200 ikasletik gora izango dira ostera, 140 irakasle ingururekin batera, lan esparruan euren burua kokatzeko behar dituzten ikasketak burutzen. Ikasturte hau bereziki garrantzitsua da Easo Politeknikoarentzat, izen juridiko berria hartu baitu: orain LHko Ikastetxe Integratua gara. Horrek zera esan nahi du, LHko ikasketak soilik dauzkagula eta lanbide heziketa jasotzeko egon litezkeen modalitate guztiak hartzen ditugula gure baitan, hala nola, hasierako eskaintza edo partziala, langileentzako etengabeko prestakuntza, profesionaltasun ziurtagiriak, konpetentziaren aitorpena eta on line heziketa. Ikasturte honetan Anatomia Patologikoko goi mailako zikloa ematen hasi gara. Hau Euskadin bakarra da eta ikerketa eta osagai teknologiko handiko guneetatik gertu egoteak bereziki pozten gaitu. LOE zikloen ezarpenarekin jarraituz, Aho eta Hortzen Higieneko goi mailako zikloa 1400 ordutik 2000ra pasatu da, hau da, bi ikasturte oso. Hainbat mintegi eta ziklotan metodologia aktiboekin hasi gara lanean, gure ikasleenganako prestakuntza beste era batera bilatuz. Horrela, beren gaitasun pertsonalak hobeto sustatu eta garatzen lagundu nahi zaie, inguruko enpresen lehiakortasuna hobetzen beren ekarpena egin dezaten, heziketaren balio soziala aldarrikatuz. Honek guztiak Easo Politeknikoak pertsonekiko duen konpromisoa azpimarratu baino ez du egiten, hauek prestakuntza eta ekipamendu, baliabide informatiko eta azken teknologien erabilerarik hoberena eskura dezaten, prestakuntza tekniko ona jasotze aldera, gaitasun pertsonalen garrantzia ahaztu gabe. Ikastetxeko zuzendaritza taldetik, Easo Politeknikoko hezkuntza kidego osoari ongi etorria eman eta ikasturte probetxugarria opa nahi dizuegu.
—|—
