| Pasa den asteartean, ekainak 2, fabrikazio mekanikoko alorguneko Mekanizazioa, Fabrikazio Mekanikoko Produkzioaren Programatzea eta Fabrikazio Mekanikoko Diseinua zikloetako ikasleak Barakaldoko BEC-en izan ziren, Makina Erremintako Biurtekoan. Horiekin batera Prebentzioko zikloko ikasleak ere joan ziren. Erakustokiak bisitatu aurretik antolatzaileek gela batean bildu gintuzten ikusi behar genuenaren ikuspegi orokor bat eskaintzeko. Era berean, lan merkatuak epe motzean eta ertainean izan litzakeen espektatiben ikuspegi bat erakutsi ziguten. Azoka honetan, besteak beste, ikustekoa zen 3D inprimagailua. EASO Politeknikoan daudenekin alderatuta, plastiko eta erretxinarekin ez ezik altzairuarekin ere egiten zuten lana eta hau, inprimagailu hauetan, jauzi kualitatibo handia da, orain arte pentsaezina. Nabarmentzekoa da aldi berean neurtzeko makinen arloan izan den aurrerapena, batez ere eskanerren erabilpenean: piezen neurketa ez ezik pieza horien hiru dimentsioko irudia ere sortu dezakete. Lana egiteko modu honek Alderantzizko Ingeniaritza deitutako teknika egitea ahalbidetzen digu. CNC makinen barruan aurten 5 ardatzekoak nabarmendu ditzakegu, mekanizazio-lanak egiterakoan eskaintzen dizkiguten aukera anitzengatik.
—|—
