| Irailaren 27an Ingurumen Hezkuntza eta Kontrola zikloko 1. mailako taldeak, Ingurunean moldatzea lanbide-moduluaren jardueren barruan Cristina Enea parkean lan egin zuen. Parkera abiatu aurretik, ikasleek honi buruzko informazioa bildu, ezaugarri guztiak aztertu eta parkean egin beharreko ibilbidea prestatu zuten. Parkean, eskolan prestatutako ibilbidea burutu eta parkearen osagai desberdinen zerrenda egin zuten (fauna, flora, azpiegiturak, hiri tresneria, ingurumen-hezkuntzako azpiegiturak…). Cristina Enea parkea Donostiako udalean burutzen diren ingurumen-hezkuntza jardueren bilgune bat da (Cristina Enea Fundazioaren egoitza bertan kokatzen da). Ziklo honetako ikasleentzat parkea bera, bere azpiegiturak eta bertan antolatzen diren ekintzak eskolan lantzen diren gaitasunak garatzeko jarduera lagungarriak izan daitezke.
—|—
