| Otsailaren 8an, ostirala, Gipuzkoako Odol Emaileen Elkarteak, 4eko informazio-hitzaldien ondoren, odol-emateak jasotzera etorri zen. Erantzuna ezin hobea izan zen irakasle zein ikasleen aldetik eta erizainek ezin izan zituzten eskabide guztiak artatu; hori dela-eta, ostiralean, hilak 15, itzuliko dira odol-emateekin jarraitzeko. Ehun pertsona baino gehiago bertaratu ziren odola ematera baina ia beste 50 gelditu ziren odola eman gabe. 71 odol-erauzketa eta zenbait analitika egin ziren; zorabioren bat edo beste ere egon zen baina batez ere oso giro ona denon artean. Harro sentitzen gara erantzun honekin. Gizartearekin konpromisoa eta eskuzabaltasuna ere gure ikur bilakatu nahi ditugu. Gure ikasgeletatik, profesional onak ez ezik, konpromisoa hartzen duten pertsonak ere formatu nahi ditugu. Eta hau da bidea……….Zorionak EASO Politeknikoa!
—|—
