Joan den maiatzaren 29an Fabrikazio Mekanikoko departamentuko ikasleak, mintegiko zenbait irakaslerekin batera bisitan joan ziren Barakaldoko BEC-en (Bilbao Exhibition Centre ) ospatu zen 27. Makina Erreminta Biurtekora.
Ospe handiko azoka hau Espainiako Makina-Erremintentzako, Osagarri, Osagai eta Erreminten Fabrikatzaileen Elkarteak (AFM) antolatzen du eta sektore honetan Estatuko garrantzitsuena da eta Europan hirugarrena. Edizio honetan makina-erreminta merkatuko fabrikatzaile eta banatzaile nagusiak izan dira eta mundu osoko bisitariek punta-puntako enpresa hauek, bakoitzak bere espezialitatean, garatu dituzten azken produktuak, teknologiak eta zerbitzuak ikusi ahal izan dituzte.
Gure ikasleek interesatzen zitzaizkien enpresen stand-ak bisitatzeko nahikoa denbora izan zuten, besteak beste: makina-erremintak, makina-erremintentzako beste makinak, piezak, osagaiak eta osagarriak, produkziorako automatizazioak, metrologia, kalitate-kontrola eta zerbitzuak.
Bisita benetan interesgarria izan zen eta hurrengo batean ere gure departamentua han izango da.
